Maria (Mutter Jesu)

D Maria (hebr./aram. מרים Mariam) isch noch em Nöije Testamänt d Mueter vom Jesus Christus gsi. Noch em Markus 1,9 u. a. het si als glöibigi Jüdin mit iirem Maa Josef und witere Aaghöörige in dr Chläistadt Nazareth in Galiläa gläbt. Noch em Matthäus 1,18–25 het si käi Gschlächtsvercheer mit iirem Maa gha bis zur Geburt vom Jesus, was vilmol as unwoorschiinlig aagluegt wird, wil im Juudedum dr Gschlächtsvercheer en integraale Däil vom Lääbe vom ene Ehepaar gsi isch. Ass si dr Messias wurd gebääre, isch ere vom Ängel Gabriel verkündet worde (Lk 1,28).

Vor allem in dr katholische Chille het sich e Kult um d Maria entwigglet, wo d Aahänger drvo glaube, ass si as Mueter vom Jesus bsundrige Iifluss uf en häig.